LAOAG CITY – Pinilaan ti kaso a perjury iti Office of the Ombudsman ti grupo a Kontra Daya ni Sen. Rodante Marcoleta mainaig iti maipagarup a panangadmitirna iti maysa nga interview a nakaawat isuna ti P112 milyon a donasion iti panagkampania idi panawen ti eleksion.
Nakailanad iti reklamo a naipila ti Kontra Daya iti babaen kada Atty. Danilo Arao, Atty. Alexander Lacson ken Dino De Leon iti opisina ti Ombudsman nga inadmitir ti senador iti interview idi Nobiembre 7, 2025 a maipagarup nga immawat daytoy ti donasion iti panagkampania ngem saanna daytoy nga inkabil iti Statement of Contributions and Expenditures (SOCE).
Dumanon iti 19,000 views ti nasao nga interview a mabuya iti YouTube no sadinno nga inbatad ti senador ti pannakaawatna ti P112 milyon a donasion kas campaign fund idi 2025.
Kabayatanna, malaksid iti reklamo a perjury, inreklamo pay ti grupo ti maipagarup a panaglabsing ni Marcoleta iti Omnibus Election Code iti Commission on Elections gapu iti panangawat ti kontribusion idi nagpaidasig kas senador idi Midterm elections.
