LAOAG CITY – Insubmitiren ni Senador Imee Marcos iti Office of the Ombudsman ti chairman’s report ti Senate Committee on Foreign Relations.
Adda ti pakainaiganna daytoy iti pannakaarestar ken ni dati a Presidente Rodrigo Duterte a naarestar ken naikabil idiay the Hague gapu iti kaso a crime against humanity.
Iti surat daytoy ken ni Ombudsman Samuel Martires, inlanad ni committee chairperson Imee Marcos nga iti panagdengngeg ket naibutaktak ti inaramid dagiti nangangato nga opisial ti gobierno.
Naammoan a dagiti addang dagiti opisial ti gobierno ket mabalin a sumango dagitoy iti criminal ken administrative cases.
Mainaig iti daytoy, dagiti sumagmamano nga opisial a kalikagum ti senadora nga imbestigaran ti Ombudsman ket isuda Justice Secretary Jesus Crispin “Boying” Remulla, Interior Secretary Juanito Victor “Jonvic” Remulla, PNP chief Police Gen. Rommel Marbil, CIDG chief Police Gen. Nicolas Torre III ken Special Envoy for Transnational Crimes Markus Lacanilao.
Mamati ti senadora a ti Ombudsman ket awan ti butengna ken awan ti kankanunonganna ken kasoanda dagiti nasken a makasoan.
Maipalagip nga idi Marso 11 idi naarestar ti dati a Presidente tapno sangoen ti kaso a crime against humanity iti International Criminal Court gapu iti nadara a kampania daytoy iti iligal a droga kabayatan iti administrasionna.
