LAOAG CITY – Sinungbatan si Senador Imee Marcos mainaig iti rakurak ni Senador Ping Lacson nga addaan daytoy ti P2.5 billion nga allocables iti babaen ti 2026 national budget.
Immunan nga inbatad ni Lacson a kumonkontra ni Sen. Marcos iti napirmaan a 2026 budget a maipagarup nga addaan ti pork barrel iti baet nga addaan met ti Senadora ti P2.5 billion wenno P3.5 billion nga allocable para iti “for later release.”
Nupay kasta, kinatawaan laeng daytoy ni Sen. Imee ken kunana a saan nga ammo ni Lacson a dagitoy ket wishlist laeng nga inpaay ti Department of Public Works and Highways (DPWH) Central Office.
Inlawlawag ti Senadora a clueless ni Lacson a dagiti taga-oposision ket amin naka-FLR wenno for later release isut gapuna a naka-zero budget-da amin.
Kunana a dagiti kakaduana iti minorya nga isuda Senators Bong Go, Bato dela Rosa ken Robinhood Padilla ket saan met a napatgan dagiti wishlist-da.
Inpettengna nga awan ti ammona iti allocables ti administrasion ken no duada ken ni Lacson ket saan met isuna nga abugada ti Malacañang.
