LAOAG CITY – Nagpanawagan ni Senador Francis “Kiko” Pangilinan iti dakdakkel a subsidiya para kadagiti mannalon ken mangngalap kagiddan ti agtultuloy a panagngato ti presyo ti langis iti world market gapu iti kumarkaro a tension iti Middle East.
Segun ken ni Pangilinan, kasapulan a nayunan ti tulong ti gobierno iti sektor ti agrikultura ken panagkalap, kagiddan ti pannakasuspenso koma a dagus ti excise tax kadagiti produkto a pretrolyo tapno makissayan ti padagsen para kadagiti konsyumer a gubuay ti panagngato ti presyo ti krudo.
Inlawlawag ti senador a no masuspenso ti excise tax iti petrolyo, mabalin a bumaba iti sumuruk-kumurang nga P6 iti kada litro ti presyo ti diesel, idinto a P10 ti kada litro ti possible a pagbabaan ti unleaded gasoline ken liquefied petroleum gas (LPG) ken P5 ti kada litro iti kerosine.
Kabayatannam inrakurak ni Pangilinan ti pannakadismaya na iti P3000 cash assistance para kadagiti mangngalap nga aggapo iti P75 milyon nga agdama a pondo ti Bureau of Fisheries and Aquatic Resource (BFAR) iti babaen ti Department of Agriculture (DA).
Inpetteng na a nababa unay ken saan a maibagay iti agdama a sitwasyon ti balor ti ayuda isut gapuna a kasapula a manayunan daytoy.
Inpalgak ti senador nga uray doblien pay daytoy wenno sumuruk-kumurang a P6000 agingga iti P7000 ket saan paylaeng a makaumanay no saan a maipababa ti presyo ti langis.
Kuna na a mabalin nga alaen ti nayun a subsidiya manipod iti P10 bilyon a Presidential Assistance to Farmers and Fisherfolks a naipalaon iti General Appropriations Acts of 2026.
