LAOAG CITY – Nagpanawagan ni Senate Minority Leader Koko Pimentel ti Department of Trade and Industry (DTI) a siguradoen nga awan ti mangabuso iti panawen ti paskua nangruna iti panagngato ti presio dagiti magatgatang para iti Noche Buena.
Inbatad ni Pimentel, nasken a saan a gundawayan dagiti negosiante ti panangselebrar ti paskua tapno ingato ti presio dagiti produkto kas ti keso, macaroni, spaghetti sauce, fruit cocktail, all-purpose cream, hamon ken dadduma pay a pang-Noche Buena.
Inlawlawag ti minority leader, ti paskua ket panawen ti panagayat ken panagparabor.
Kunana a napateg nga agtalinaed ti patas a presio dagiti kangrunaan a magatgatang para kadagiti amin a Pilipino nangruna kadagiti marigrigat.
Innayonna a nasken a naiget ti monitoring nga ar-aramiden ti Department of Trade and Industry tapno mapagsungbat dagiti kompania a karaman iti price manipulation.
