LAOAG CITY – Nagballaag ni Senate President Francis “Chiz” Escudero a paarestar na dagiti kontratista dagiti kuwestyonable a flood control projects no saan da a mapan agatendar iti iyuswat manen a panagdengngeg ti Blue Ribbon Committee.
Naka-schedule ti Setyembre 1 a maikadwa a panagdengngeg ti komite no sadinno a napatuludanen ti subpoena dagiti contractor nga immunan nga inpublikar ni Presidente Ferdinand Marcos Jr.
Inpetteng ni Escudero a saan nga agpangadua a mangpirma ti arrest warrant kontra kadagiti kontratista a saan nga agatendar iti imbestigasyon.
Inpalgak na a nailanad iti pagalagadan ti Senado a mabalin a paarestar da ti siasinno man a naipaayan ti subpoena ngem saan a napan nagparang.
Innayon ni Escudero nga obligasyon dagiti contractor ti agpalawag mainaig kadagiti maipagarop a ghost ken substandard a proyekto.
