LAOAG CITY – Nagballaag ni Deputy Minority Leader Risa Hontiveros nga ad-adu pay ti sangoen a kaso ni dati a Bamban, Tarlac Mayor Alice Guo wenno Guo Hua Ping iti kanito a mangipila isuna ti kandidatura para iti eleksion inton sumaruno a tawen.
Segun kenkuana, posible a makaaramid ti material misrepresentation ni Guo Hua Ping iti kanito a mangipila isuna ti Certificate of Candidady (COC) ken ideklarana a daytoy ket maysa a Pilipino banag nga awan ti kinapudnona.
Inlawlawag ti Senadora, ti Certificate of Candidady ket maysa a napateg a dokumento a masapataan isu a no ipapilit ni Guo Hua Ping ket mabalin a manayonan ti kaso a perjury kontra kenkuana.
Makaunget pay ni Hontiveros ken ni Guo gapu iti agtultuloy a panangluklukona kadagiti umili iti baet nga adda isuna iti uneg ti pagbalodan.
Kabayatanna, inbatad ni Sen. Win Gatchalian, nasken nga ipatungpal dagus ti Commission on Elections ti maiyannatop a legal a wagas tapno madiskualipikar ni Guo iti panagpaidasigna inton panagbubutos.
Inpetteng ni Gatchalian, ti plano a panagpailayon ni Guo Hua Ping a mas am-ammo iti nagan nga Alice Guo iti pampubliko a posision ket nalawag a mangdadael iti linteg ditoy pagilian.
Immuna iti daytoy, inpeksa dagiti Senador ti takderda kalpasan nga inrakurak ti abugado ni Guo a ni Atty. Stephen David a mangipila ti klientena ti Certificate of Candidady tapno agpaidasig iti kina-Mayor Bamban, Tarlac.
