LAOAG CITY – Inadmitir ni Senador Robinhood Padilla nga inlugan na laeng ni Senador Ronald dela Rosa a rimuar iti Senado ken inbaba na iti Makati City, ngem awan ti ideya na no sadinno ti nagturungan ti senador.
Inlawlawag daytoy ni Padilla kalpasan dagiti alegasyon a tinulungan na ni dela Rosa a naglibas a rimuar iti Senado, banag a naglikudan ti senador ken inpetteng na nga awan ti aktibo nga arrest warrant manipod iti lokal a korte ti pagilian.
Kuna ni Senador Padilla nga inpakaammo na ken ni Sen. dela Rosa a kasapulan nga agawid iti balay da idi parbangon ti Mayo 14, agarop innem nga oras kalpasan ti pammaltog iti uneg ti senado iti napalabas a lawas.
Inpaganetget ni Padilla a saanna a napagkedkedan ni dela Rosa gapu ta awan ti lugan na gapu ta nakilugan metlaeng daytoy ken ni Senate President Alan Peter Cayetano idi nagturong iti senado.
Innayon ni Padilla a bimmaba ni dela Rosa iti Makati City no sadinno nga isu met ti naglugan iti bukod na a behikulo.
Agtugma ti nagbalin a rakurak ni Padilla iti CCTV footage manipod iti Senado a pakakitaan ti iruruwar da ken ni dela Rosa manipod iti compound ti Senado iti oras ti alas-2:30 ti parbangon idi Mayo 14.
Kinumpirmaran met iti report ni Department of the Interior and Local Government Secretary Jonvic Remulla a nakita a nagturong ti puraw a lugan ni Padilla iti Makati City.
Inpalgak pay ni Padilla a saan da a naglibas gapu ta awan ti nanglapped kadakuada idi pimmanaw da iti senado.
Innayon na nga ado dagiti pulis iti uneg ken ruwar ti senado ken adda ti CCTV cameras ngem awan ti nanglapped kadakuada a pumanaw iti premises ti Senado.
