LAOAG CITY – Inbatad ti House Prosecution nga ininsulto ni Senador-judge Robin Padilla ti lagip dagiti bannuar ti Pilipinas ken ti pimmusay a martir a ni Senador Benigno Aquino, Jr. iti babaen ti panangiyarigna ti alias-da kadagiti maipagarup a nakaawat iti confidential funds ni Bise Presidente Sara Duterte.
Sinuportaran ni Deputy Speaker Paolo Ortega V ti La Union ni Adiong, a kunana a nasayaat ti panggep dagiti alias nga inusar dagiti bannuar.
Inrason ni Padilla a dagiti alias ket napateg iti panangsalaknib kadagiti kinasiasino kabayatan dagiti kompidensial ken napeggad nga operasion, nangruna kadagiti panawen ti gubat. Dinakamatna dagiti nagan a kas iti “Dimasalang,” “Siling Labuyo,” “Maypag-asa,” “Magtalo” ken “Leon Kilat”.
Inawaganna pay ti pimmusay nga oposision a ni Senador Ninoy, kritiko ti Martial Law regime ni Presidente Ferdinand Marcos, a nangusar iti alias a “Marcial Bonifacio” idi nagsubli ditoy Pilipinas manipud na-exile idi 1983.
Kinontra met ni Senador-judge Bam Aquino, a kaanakan ni Ninoy, iti babaen ti panangibagana nga inusar ti ulitegna ti alias ngem impaganetgetna nga awan ti confidential funds ti pimmusay a senador ken saan a karaman kadagiti nagan a nagparang kadagiti resibo ti acknowledgement iti babaen ti panangusig.
