LAOAG CITY – Dinillaw ni Sen. Sherwin Gatchalian ti nailungalong a pannakaitantan manen ti 2026 Barangay at Sangguniang Kabataan Elections (BSKE).
Inpetteng na a mailabsing daytoy iti Konstitusyon ken mangitunda ti pannakapukaw ti karbengan dagiti botante a makabotos ti kayat da nga opisyal.
Inbatad ni Gatchalian a saan a kurang ti pondo ti gobierno para kadagiti programa a pannakaipaaya ti ayuda isut gapuna a saan a rumbeng a maapektaran ti dadduma a function ti gobyerno.
Kuna na a ti P9 bilyon a nailatang para iti BSKE ket bassit laeng a kantidad no ikumpara iti P230 bilyon a pondo a mabalin pay a gastusen para kadagiti social aid programs.
Ti rakurak ni Gatchalian ket kalpasan ti inlungalong ti sumagmamano nga agpanpanday linteg nga i-realign ti budget ti BSKE tapno masolusyunan ti krisis iti enerhiya.
