LAOAG CITY – Immapela ni Senador Raffy Tulfo iti Department of Labor and Employment (DOLE) ken iti National Wages and Productivity Commission nga adalen nga agpada ti minimum wage kadagiti amin a mangmangged iti intero a pagilian.
Para ken ni Sen. Tulfo, Vice Chairman ti Senate Committee on Labor and Employment, saanen a nainkalintegan a saan nga agpapada ti minimum wage iti kada rehion.
Inlawlawagna nga amin a mangmangged ket apektado ti inflation wenno panagngato ti presio dagiti magatgatang.
Inpetteng ti Senador a ti panagadu dagiti tattao idiay Metro Manila ket gapu iti bassit a sueldo kadagiti probinsia ken adayo a rehion.
Iti agdama, adda ti P695 ti inaldaw a minimum wage iti National Capital Region (NCR) ken adayo daytoy iti P411 a daily minimum wage iti Bangsamoro Autonomous Region in Muslim Mindanao (BARMM) ken P415 met iti CARAGA region.
