LAOAG CITY – Kalikagum ni Senador Vicente ‘Tito’ Sotto III nga isubli iti Senado ti random drug testing kadagiti amin nga empleado ti Senado.
Daytoy ket kagiddan iti panagusar ti maysa nga staff ti Senador a nagusar ti marijuana iti comfort room ti Senado.
Inbatadna nga idi panawenna kas Senate President ket mangisaysayangkat ti Senate Office of the Sergeant at Arms (OSAA) ti optional drug test kadagiti Senador ken random test para kadagiti empleado.
Malidayan daytoy gapu ta idi nalpasen ti terminona ket saanen a maisaysayangkat.
Inpalgakna a nakababain ti napasamak gapu ta arig nadadael ti imahe ti Senado iti napasamak.
Maipalagip nga in-report iti Office of the Sergeant at Arms ni Victor Patelo ti security personnel a naka-deploy iti maikalima a kadsaaran ti Senate building ti naidumduma nga angot nga aggapu iti comfort room kadagiti babbai ken idi Hulio ket nakaawat met ti report manipud iti maysa a lalaki nga staff ken kunana nga adda ti naidumduma nga angot iti nasao a lugar.
Naudi a nakita a nagusar iti comfort room ket ti aktres a ni Nadia Montenegro nga staff iti agdama ni Senador Robin Padilla.
Naammoan a gapu iti insidente ket pinag-leave of absence pay laeng ti aktres.
