LAOAG CITY – Nagbalin nga emosional ni Senator-Judge Camille Villar bayat ti panawaganna kadagiti kakaduana a senador nga isardengdan ti panagatakeda kadagiti senador a saan a makaatatendar iti impeachment trial ni Vice President Sara Duterte.
Iti nagbalin a manifestation-na iti impeachment court, inbatad ni Villar a saan a personal a desision dagiti senador a saan a makaataendar iti proceedings.
Inpetteng ti senador a saan koma nga itudo wenno mainaganan a kriminal ti saan pay a napaneknekan iti korte dagiti kakaduada nga awan iti trial, aglalo ta awan pay ti pinal a hatol kadagiti kaso a sangsangoenda.
Inpanagetget ni Villar a saan nga umno nga awaganda ida ti plunderer wenno agtatakaw no saan pay a napaneknekan ti panaglabsingda.
Innayonna pay a kas kaubingan a miembro ti Senado, nagpanawagan ni Villar kadagiti kakaduana a senador a respetarenda koma ti tunggal maysa kadakuada ken liklikan dagiti personal a panagatake bayat nga agtultuloy ti impeachment proceedings.
