LAOAG CITY – Nagpanawagan ni Senador Sherwin Gatchalian iti Department of Education (DepEd) nga idadaulwan ni dati a Senador Juan Edgardo “Sonny” Angara a punuan ti panagkurkurang ti principal iti amin a pampubliko a pagadalan iti intero a pagilian.
Iti statement, inpetteng ni Gatchalian ti kinapateg a mapunuan ti panagkurkurang ti principal iti pampubliko a pagadalan ken magun-od daytoy no baliwan ti daan a pagannurutan iti Department of Education.
Naamoan a nasurok a kagudua ti amin a pampubliko a pagadalan iti pagilian ti awan principal na.
Iti maysa a panagdengngeg ti Second Congressional Commission on Education (EDCOM II), inreport ti Department of Education a 20,718 laeng iti 45,918 a pampubliko a pagadalan iti pagilian ti addaan ti principal.
Para iti nabatbati a 24,480 a pagadalan ket Teachers-In-Charge laeng ti agserserbi a dagitoy ket agkasapulan ti naan-anay a panagsanay ken suporta.
