LAOAG CITY – Trataren iti senado intono Agosto 6 ti nagbalin a desisyon ti Korte Suprema a nangideklarar kas unconstitutional ti Articles of Impeachment kontra ken ni Vice President Sara Duterte.
Daytoy ti inrakurak ni Senate President Francis “Chiz” Escudero kabayatan ti plenary session.
Inlawlawag ni Escudero nga iti umay a lawas da a trataren daytoy a banag tapno maikkan dagiti senador ti naan-anay nga oras wenno panawen a mangadal ti ruling ti kangatoan a korte iti pagilian.
Immannugot met amin dagiti kameng iti senado a presente iti dayta a gundaway. Immunan nga inrakurak ti kamara de representantes nga agsagsagana dan para iti panangipila da ti motion for reconsideration iti nagbalin a desisyon ti korte suprema iti impeachment case kontra ken ni Vice President Duterte.
