LAOAG CITY – Ilunglungalong dagiti sumagmamano a Senador ti pannakabalbaliw iti tawen ti panagretiro dagiti pulis, mangisursuro ken non teaching personnel ti Department of Education (DepEd).
Iti nailungalong a Senate Bill No. 2758 wenno ti Act Increasing the Compulsory Age of Retirement for Officers and Non-officers of the Philippine National Police (PNP) ni Sen. Imee Marcos, kalikagumna nga ipangato ti retirement age manipud iti tawen a 56 ket mapagbalin a 57.
Gagemda nga amendaran ti gakat ti Section 39 ti Republic Act no. 6975 wenno ti “Department of the Interior and Local Government Act of 1990.”
Kalikagum ti gakat a tuladen ti retirement age ti Philippine National Police officers ken personnel manipud iti 56 ket mapagbalin a 57 kas ti Armed Forces of the Philippines (AFP) tapno maipasigurado ti continuity ken stability ti liderato ken excellence iti Philippine National Police.
Iti agdama, ti mandatory retirement age ti maysa a police officer ket 56.
Kabayatanna, nangipasa met ni Senate President Francis Chiz Escudero ti Senate Bill 58 wenno ti gakat a mangipababa iti compulsory retirement age kadagiti empleado ti Department of Education manipud iti 65 years old ket mapagbalin a 60 years old karaman ditoy dagiti pampubliko a mangisursuro.
No bilang maipasa daytoy kuna ni Escudero, mabenepisiaran dagiti rinibu nga empleado ti Department of Education, agpada a mangisursuro ken dagiti saan a mangisursuro a kalikagumda a maapresiar ti paset iti biagda iti sabali a trabaho malaksid iti nakadawyan a responsibildad iti gobierno.
Malaksid iti daytoy, kunana a babaen iti daytoy ket manglukat pay ti oportunidad kadagiti naub-ubing a mangisursuro ken non teaching personnel para kadagiti trabaho iti Department of Education.
