LAOAG CITY – Nagpaot ti sumagmamano nga oras ti debate iti plenaryo ti senado idi kalman, Miyerkules mainaig iti inpila a motion to dismiss ni Senador Rodante mainaig iti impeachment case ni Vice President Sara Duterte.
Nagbotos ti 19 a kameng ti senado pabor a mai-archive ti Articles of Impeachment kontra ken ni Vice President Duterte idinto nga uppat ti nangkontra ken maysa ti nag-abstain.
Dagiti uppat a senador a nangkontra a mai-archive ti articles of impeachment ket isuda Senate Minority Leader Tito Sotto, Senator Risa Hontiveros, Senator Bam Aquino ken Senator Kiko Pangilinan idinto a ti nag-abstain ket ni Senador Ping Lacson.
Immuna iti daytoy, ginandat ni Sen. Sotto nga itantan ti pannakaipasa ti mosyon iti babaen ti motion to table, wenno panangiwalin paylaeng ti isyu gapu ta ti palawag na ket adda paylaeng ti inpila a motion for reconsideration ti Kamara de Representantes seknan iti desisyon ti Korte Suprema, isut gapuna a saan nga agdardaras a mangibasura ti kaso.
Maipalagip nga idi Hulyo 25, 2025, nangiparuk-at ti desisyon ti Korte Suprema a nangideklarar a mailabsing iti Konstitusyon ti impeachment complaint kontra ken ni Vice Presidente Duterte.
Kabayatanna, immunan a nagbotos ti senado idi Hunyo 10 tapno isubli ti impeachment case iti Kamara de representantes no sadinno nga iti botos nga 18–5, pinili ti senado a saan paylaeng nga ituloy ti impeachment trial.
