LAOAG CITY – Inaprubaran ti senado ti 2025 budget ti Office of the Vice President (OVP) iti uneg laeng ti agarop 10 a minuto.
Daytoy ket kalpasan nga awan pulos ti nangkwestyunar ti P733-million a nailungalong a budget babaen ti Senate finance committee.
Al-alisto koma pay a naaprubaran ti budget ti Office of the Vice President bayat ti panag-mosyon ni Senador Ronald “Bato” dela Rosa.
Nupay kasta, naibabawi ti mosyon ni dela Rosa kalpasan nga immapela ni Senador Bong Go a manayunan wenno isubli ti dati a pondo ti Office of the Vice President para iti social services ti nasao nga opisina.
Inpetteng ni Go a ti pannakaipababa ti budget ti Office of the Vice President ket makaapektar kadagiti serbisyo nga ipapaay ti nasao nga opisina kangrunaan na dagiti tulong tunggal adda ti kalamidad, livelihood projects, educational, medical, ken burial assistance.
Innayon ni Go a masapol a maikkan ti gundaway ni Vice President Duterte nga agserbi kadagiti Pilipino ken saan a rumbeng a matrato kas “spare tire” iti gobierno.
Kabayatanna, inlawlawag ni Senador Grace Poe, chairperson ti Senate finance committee a saan pay a pinal ti inaprubaran da a pondo ti Office of the vice President gapu ta mabalin paylaeng nga ilungalong dagiti senador no manayunan wenno makissayan pay ti budget ti opisina ti bise presidente.
