LAOAG CITY – Sangsangkamaysa nga inaprubaran dagiti kameng ti senado ti maikatlo ken maudi a pannakaibasa ti nailungalong a gakat para iti pannakaipaay ti emergency powers ken ni President Ferdinand “Bongbong” Marcos Jr. tapno maipababa wenno masuspenso ti fuel excise taxes kabayatan ti agtultuloy a gubat iti Middle East.
Kabayatan ti plenary session, nagbotos ti 17 a senador pabor iti nasao nga addang, awan ti nangkontra ken awan ti nag-abstein para ti pannakaipasa ti Senate Bill No. 1982, wenno ti “Än Act authorizing the President to suspend or reduce excise tax on petroleum products amending for the purpose Article 148 of the National Internal Revenue Code, as amended.”
Iti babaen ti nasao nga addang, mabalin nga ikkaten ni Presidente Marcos ti agingga iti P10 iti kada litro nga excise tax iti gasoline ken P6 iti diesel no ti presyo ti krudo no umabot wenno aglabes iti $80 ti kada bariles iti uneg ti maysa a bolan, wenno adda ti naideklarar a national emergency.
Nailawlawag iti gakat a ti pannakasuspenso wenno panagkissay ti buwis ket agingga iti innem a bolan laeng, ken saan a lumabes iti pakabuklan a maysa a tawen,ken mabalin nga usaren ti president ti bilegna agingga iti Disyembre 31, 2028.
Maipalagip nga iti laeng napalabas a lawas ket sinertipikaran kas urgent ni Presidente Marcos ti gakat a mangipaay kenkuana ti otoridad a mangsuspenso wenno mangipababa ti fuel excise taxes gapu iti krisis iti Middle East.
