LAOAG CITY – Intantan ti Senado ti maikatlo nga aldaw ti bicameral conference committee meeting iti proposed 2026 national budget gapo iti “deadlock” iti alokasyon ti Department of Public Works and Highways (DPWH).
Segun kenni Senator Sherwin Gatchalian, ti chairperson iti Senate finance committee, nagtalinaed ti takder ti upper chamber a kontra iti panagusar ti overpriced construction materials para iti infrastructure projects ti gobierno intono 2026.
Inbatad na a kalpasan ti caucus, nagdesisyon da nga i-postpone pay laeng ti bicam tapno ma-esolba ti isyu iti House of Representatives ken iti Department of Public Works and Highways.
Kunana nga iti parte ti Senado, tinawagan na dagiti counterpart na ken inbaga na ti desisyon ti Senado.
Umunan a kinissayan ti Senado ti lungalong a 2026 budget ti ahensya iti P570.48 billion manipud iti P624.48 billion iti House of Representatives’ version.
Inlawlawag ni Gatchalian a ti adjustment iti presyo dagiti materyales ket naibasar iti Construction Materials Price Data (CMPD) nga insubmitir ti Department of Public Works and Highways iti Senado a nangitunda iti pannakakissay ti agarop P45 billion iti lungalong a pondo ti ahensya.
Inpetteng na a ti laeng agbalbalin nga isyu ita ket ti adjustment factor no sadinno ibagbaga ti Department of Public Works and Highways nga amangan no saan a mabalin nga iyaplikar gapo iti nagduduma a sitwasyon kadagiti proyekto.
Naamoan nga immapela ti Department of Public Works and Highways iti Senado nga isubli ti pondo a naikkat manipud iti proposed 2026 budget gapo iti reductions basar iti Construction Materials Price Data.
