LAOAG CITY – Nagkedkedan ti senado ti mosyon ni Senate Minority Leader Tito Sotto nga i-table wenno itantan paylaeng ti pannakatratar ti mosyon ni Sen. Rodante Marcoleta nga i-dismiss ti impeachment complaint kontra ken ni Vice President Sara Duterte.
Iti botos a 5-19, napagnunumoan iti senado nga i-archive ti articles of impeachment ni Vice President Duterte.
Karaman dagiti nagbotos pabor iti motion a lay on the table ni Minority Leader Vicente Sotto Ill ket isuda Sen. Risa Hontiveros , Sen. Ping Lacson ken Sen. Vicente Sotto manipod iti minority bloc idinto a ni Sen. Kiko Pangilinan ken Sen. Bam Aquino manipod met iti maojority bloc tapno koma maituloy ti impeachment trial kontra ken ni VP Sara Duterte.
Immunan nga inpila iti plenary session ni Sen. Marcoleta ti mosyon nga i-dismiss ti impeachment articles kontra iti bise presidente no sadinno nga inusar na a pagibasaran ti desisyon ti Korte Suprema a nangideklarar iti reklamo kas unconstitutional gapu iti panaglabsing iti one-year rule ken kinakurang ti due process.
Ginandat ni Sen. Sotto nga itantan ti pannakaipasa ti mosyon iti babaen ti motion to table, wenno panangiwalin paylaeng ti isyu gapu ta ti palawag na ket adda paylaeng ti inpila a motion for reconsideration ti Kamara de Representantes seknan iti desisyon ti Korte Suprema, isut gapuna a saan nga agdardaras a mangibasura ti kaso.
Nupay kasta, 19 a senador ti nagbotos kontra iti mosyon ni Sotto idinto a 5 laeng dagiti pimmabor isut gapuna a naan-anay a naibasura ti inlungalong na.
Gapu iti daytoy, naitultuloy ti pannakatratar iti mismo a mosyon ni Marcoleta nga ibasura ti reklamo.
Maipalagip nga idi Hulyo 25, 2025, nangiparuk-at ti desisyon ti Korte Suprema a nangideklarar a mailabsing iti Konstitusyon ti impeachment complaint kontra ken ni Vice Presidente Duterte.
Kabayatanna, immunan a nagbotos ti senado idi Hunyo 10 tapno isubli ti impeachment case iti Kamara de representantes no sadinno nga iti botos nga 18–5, pinili ti senado a saan paylaeng nga ituloy ti impeachment trial.
