LAOAG CITY – Nakalukat ti Senado iti babaen ti liderato ni Senate President Francis “Chiz” Escudero nga ipasa ti mailunglungalong a gakat a maamendaran ti Rice Tarrification Law.
Segun ken ni House Speaker Martin Romualdez, napagtulagan daytoy kalpasan ti panagtaripnongda ken ni Escudero iti Malakanyang.
Nupay kasta, saan nga umannugot ni Sen. Cynthia Villar, ti Chairperson ti Senate Committee on Agriculture and Food, ti nasao a gakat a maamendaran ti Rice Tarrification Law nga inaprobaranen ti Kamara iti maikatlo ken maudi a pannakaibasana.
Inbatadna a ti immuna a koordinason ti National Food Authority kadagiti korapsion iti rice importation ti makaigapu no apay saan a dagus a naipasa ti gakat.
Inlawlawagna nga iti babaen ti nasao a gakat, mapalubusan ti unlimited a panagserrek dagiti imported a bagas iti pagilian, iti P10 a bilyon a pisos iti tariff collection ti maipan iti Rice Competitiveness Enhancement Fund para iti mechanization, interventions ken dadduma pay a tulong a mangipangato iti produksion dagiti mannalon.
Iti baet daytoy, ilunglungalong ti Kamara ti panangipasa iti pannakaamendar iti Rice Tarrification Law a mangipalubos iti National Food Authority tapno gumatang ken aglako ti bagas tapno lappedan ti panagngato ti presio kadagiti bagas.
