LAOAG CITY – Awan pay laeng ti serrek ken sesyon iti Senado inton bigat, aldaw ti Lunes tapno maiwayat ti panagdalus ken assessment kalpasan ti napasamak nga uram iti pasdek.
Saan met a sakup ti pannakasuspenso dagiti empleado manipud iti security, maintenance ken general services nga agtultuloy a naka-duty tapno masigurado ti kinatalged ken kinaurnos iti uneg ti compound.
Inpasigurado ni Senate President Vicente “Tito” Sotto III nga awan ti nadadael a napapateg a dokumento gapu iti insidente.
Basar iti Bureau of Fire Protection (BFP), nangrugi ti uram iti maikadua a kadsaaran ti pasdek ken insigida a nasebseban kalpasan ti sumurok maysa nga oras nga operasion dagiti bumbero.
Basar iti pakpakauna a report, mapattapatta a dumanon iti P1.2 milyon ti balor ti pannakadadael dagiti sumagmamano nga opisina ken kagamitan.
Agtultuloy ti imbestigasion ti Bureau of Fire Protection ken Senate Sergeant-at-Arms tapno maammoan ti namunganayan ti uram ken ti pakabuklan a kalawa ti nauram.
Nagpanawagan ti Senado iti publiko nga agtalinaed a kalmado ken inpasingkedna a maituloy dagiti trabahoda apaman a malpas ti panagdalus ken maipasigurado ti kinatalged iti pasdek.
