LAOAG CITY – Awanen iti protective custody ti Senado ni Senador Ronald “Bato” dela Rosa kalpasan ti boluntaryo nga ipapanaw na.
Daytoy ket basar ken ni Senate President Alan Peter Cayetano.
Inlawlawag met ni Acting Senate Sergeant-at-Arms Mao Aplasca a ti naipaay a protective custody ken ni Dela Rosa ket maysa a pribilehiyo a mabalin na a pagkedkedan iti aniaman nga oras.
Kuna na a saan da a mabalin a lapdan ti senador manipod iti ipapanaw na iti senado no saanna a kayat a gundawayan ti nasao a pribelihiyo.
Immunan nga inpetteng ni Senate President Cayetano a nawaya a pumanaw iti Senado ni Dela Rosa gapu ta awan pay ti naawat na nga arrest warrant manipod iti lokal a korte ti Pilipinas.
Maipalagip nga immunan a naireport nga awanen ni dela Rosa iti senado ken pimmanaw daytoy pasado alas-dos ti parbangon idi Mayo 14.
Naipasidong laeng ni dela Rosa iti protective custody ti Senado idi Lunes, Mayo 11 kalpasan ti gandat a panangarestar dagiti kameng ti National Bureau of Investigation (NBI) babaen ti bileg ti arrest warrant ti International Criminal Court (ICC).
Nangisyu ti arrest warrant ti international tribunal ken ni Dela Rosa kalpasan a nainaganan kas maysa kadagiti “indirect co-perpetrators” ni dati a Presidente Rodrigo Duterte iti kaso a crimes against humanity gapu kadagiti maipagarop a pammapatay iti babaen ti war on drugs ti Duterte administration manipud 2016 agingga iti 2018.
