LAOAG CITY – Kalikagom ni Senador Cynthia Villar a makontrol ti populasyon ti aso ken pusa partikular iti marigrigat a lugar nga agpangpangta iti salun-at ti umili.
Inbatad na a naduktalan na nga umab-abot iti 12 a “kuting” ti maipaspasngay ti kada pusa iti kada tawen ken uppat met nga uken ti maipaspasngay ti kada aso iti kada tawen.
Inlawlawag ni Villar a no kastoy ti mapasamak ket mabalin a saan da a mataraken amin wenno awan ti ipakan dagiti akin-taraken a mangitunda ti panagbalin da a stray dogs.
Inpaganetget pay ni Villar a ngumatngato ti pangta iti sakit kas ti rabies, leptospirosis ken parasites, no umado dagiti walang nga ayop.
Gapu iti daytoy, kuna ni Villar a masapol a mangiyuswat ti lokal a gobierno ti ad-ado a panagkapon tapno makissayan dagiti walang nga ayop iti kalsada.
Inpetteng pay ni Villar nga uray nangipatakder ti rescue ken stray animal shelter ti sumagmamano a lokal a gobierno ngem gapu ta limitado ti pondo ket adda latta ti krisis iti ayop nga awan ti pagnaedan da agingga a saanen a mabilang dagiti mapatpatay nga aso ken pusa usar ti agas.
