LAOAG CITY – Nagpanawagan ni Senador Erwin Tulfo a siguradwen a mairanud dagiti minilyon a motorista iti plano a panangsuspenso ti excise tax iti petrolyo nga ilunglungalong ti gobierno tapno maalay-ayan ti epekto ti nangato a presyo ti langis.
Iti panagdengngeg ti Senate Committee on Ways and Means, nagballaag ni Tulfo kontra iti posibilidad a diesel laeng ti sakupen ti tax relief.
Kuna na nga ado dagiti mabati a motorista, a gasolina ti us-usaren da no malimitaran laeng iti diesel ti sakupen ti suspensyon ti excise tax.
Segun pay iti senador, mapatta-patta nga adda ti 8.5 milyon a Pilipino ti agus-usar ti motorskilo iti inaldaw kas kangrunaan a transportasyon iti iseserrek iti trabaho wenno pagbiagan.
Mainaig iti daytoy, insungbat ni ni Usec. Karlo Adriano ti Department of Finance nga ikonsiderar ti Development Budget Coordination Committee ken ti Department of Energy (DOE) ti lungalong tapno maaddaan ti ad-adda pay a komprehensibo a rekomendasyon para iti presidente.
Kabayatanna, nagballaag ni Tulfo kontra iti possible a panagpulpulitika iti panagibunong ti fuel subsidy.
Inpetteng ti senador a saan a rumbeng nga usaren dagiti politiko ti krisis iti presyo ti langis para iti bukod nga interes.
Innayon na nga aggapo iti buwis ti kwarta a maibunong kadagiti umili isut gapuna a rumbeng nga awan ti aniaman nga interbensyon dagiti pulitiko iti panagibunong kadagitoy.
