LAOAG CITY – Inpetteng ni Senate President Pro Tempore Ping Lacson a saan pay a nakalusot da Senador Jinggoy Estrada ken Senador Joel Villanueva iti isyu ti budget insertions.
Inpetteng ni Lacson, a mabalin a “selective” ti memorya ti nangiraman kadakuada ngem saanna a kayat a sawen a nakalusuten dagitoy iti isyu ti ginasut a milyon nga insertions iti General Appropriations Acts (GAAs) para iti 2023 ken 2025.
Inbatad ti senador a naduktalan ti P600 milyon a maipagarop a nailatang para iti flood control projects iti Bulacan iti unprogrammed funds ti 2023 General Appropriations Acts, nga ikonkonektar ni Hernandez ken ni Villanueva, banag a naglikudan met ti senador ti alegasyon kenkuana.
Kuna ni Lacson a ti P600 milyon ket nakita iti dokumento nga aggapo ken ni Senador Sherwin Gatchalian.
Iti panagdengngeg iti Blue Ribbon Committee, intudo ni Hernandez a ti maipagarop a flood control projects ni Villanueva ket manipod iti unprogrammed funds iti 2023 General Appropriations Acts.
Immunan nga inbatad ni Lacson nga adda ti P355 milyon nga infrastructure projects iti Bulacan nga ikonkonektar ni Hernandez ken ni Sen. Jinggoy Estrada ti nakita iti 2025 General Appropriations Acts, a naglikudan met ti nasao a senador it alegasyon.
Inpakaammo ni Lacson a pinalubusan na nga agatendar ti dua a senador iti panagdengngeg gapu ta daytoy ket maysa a karbengan ti siasinno man a mangsango ti mangak-akusar kadakuada.
Innayon ni Lacson nga iti kada indibidwal, ordinaryo man wenno senador, ket addaan ti patas a karbengan.
Kinonsoltar na metten legal staff na sakbay nga agaramid ti desisyon a palubusan dagitoy nga agatendar.
Kabayatanna, saan pay a nadalusan ti dua a senador iti isyu ti budget insertions iti babaen ti 2023 ken 2025 General Appropriations Acts.
