LAOAG CITY – Manamnama a ni Senador Imee Marcos ti agbalin a kangrunaan a sangaili ken agsarita iti maika-11 a Tan-ok ni Ilocano Festival of Festivals iti masungad a Pebrero 16, 2024.
Daytoy ti kinumpirmaran ni Gob. Matthew Marcos Manotoc bayat ti iyaasideg ti nadakamat a festival ditoy Ilocos Norte.
Mamati isuna a kas kadagiti kallabes a pannakaisayangkat ti nadakamat a festival ket insaganaan manen a naimbag daytoy dagiti nagduduma a Local Government Units wenno LGU’s.
Imbatadna a sigurado nga ad-adda a mainspiraran nga agsagana dagiti maseknan gapu iti manamnama a pannakidanggay ti senador nga isu ti ina na a nangirubuat iti nasao a festival.
Mainaig iti daytoy, gutgutigoten ti gobernador dagiti umili a mangipaay ti suportada iti nasao nga aktibidad.
Maipalagip a ti nagkampeon itay napalabas a tawen ket ti Dinaklisan Festival ti ili a Currimao, no sadinno a maysa a milyon a pisos ti premyo nga inpaay ni Pres. Ferdinand R. Marcos Jr. a nagbalin met a kangrunaan a sangaili idi napan a tawen.
