LAOAG CITY – Immapela ni Senator-judge Migz Zubiri iti Commission on Audit (COA) a mangiruar kadagiti maudi a naduktalanda mainaig iti agtultuloy nga imbestigasion iti panangusar ni Bise Presidente Sara Duterte iti confidential funds.
Iti manifestation ni Zubiri, kinunana nga ad-adda a makatulong kadagiti senador judges ti panagsasarita ken panagdesision no adda maudi a pangngeddeng ti COA.
Kinunana pay a narigat ti makaala iti sungbat manipud kadagiti saksi gapu iti pending a “motion for reconsideration” ti Office of the Vice President (OVP) iti COA mainaig iti notice for disallowance.
Impasingked ti senador judge a ti COA ti maudi nga arbiter kadagiti banag a posible nga iregularidad iti pannakausar ti pondo dagiti ahensia ti gobierno.
Inlawlawag ni Impeachment Court Presiding Officer Francis Chiz Escudero nga independent constitutional commission ti COA isu a saanda a mapilit a mangsurot iti kayatda.
