LAOAG CITY – Naglikudan ni Senador Francis “Kiko” Pangilinan dagiti ispekulasyon a maikonkonektar daytoy iti maipagarop a baro a kudeta iti liderato ti Senado, ken inlawlawag na a saan nga interesado nga agbalin a Senate president.
Iti Facebook post ti senador, inbatad na nga ad-adda a kayatna a tutukan ti isyu ti food security ngem ti makiinnagaw ti liderato iti kangatoan a pagpandayan linteg iti kongreso.
Inrakurak daytoy ni Pangilinan kalpasan a naireport nga adda ti sumagmamano a senador a maipagarop nga agtrabtrabaho tapno masukatan ni Senador Alan Peter Cayetano sumagmamano nga aldaw laeng kalpasan a naipatugaw kas Senate president kasukat ni Senador Vicente Sotto III idi Mayo 11 ita a tawen.
Basar iti report, adda ti sumagmamano a senador a maipagarop a saan a kumbinsido iti estilo ti panangidaulo ni Cayetano ken agdudua da no kabaelan na a pagmaymaysaen ti Senado iti nabatbati a tawen ti administrasyon ni Presidente Ferdinand “Bongbong” Marcos Jr.
Immunan a naikkat ni Pangilinan kas chairperson ti Senate committee on agriculture, food and agrarian reform kalpasan ti panagbalbaliw ti liderato ti Senado.
Kabayatanna, nakumpleto ni Cayetano ti minimum a 13 a botos tapno agbalin a Senate president iti tulong ti suporta ni Senador Ronald dela Rosa, a nagpakita manen iti Senado kalpasan ti innem a bolan a panaglangan na tapno makipaset ti panagbotos para iti bato a liderato.
