LAOAG CITY – Inbatad ti Malakanyang nga addan iti babaen ti hurisdiksyon ti Sandiganbayan da Senador Rodante Marcoleta ken Jinggoy Estrada.
Daytoy ti nagbalin a sungbat ni Presidential Communications Office (PCO) Undersecretary ken Palace Press Officer Atty. Claire Castro iti baet ti panawagan ni Senador Marcoleta iti Senate impeachment court nga agbiruk ti wagas tapno mapalubusan da a makipartisipar iti impeachement trial ni Vice-President Sara Duterte.
Segun ken ni Castro, mamati iti ruling ti impeachment court, ken no aniaman ti agbalin a desisyon ti senado mainaig iti manipestasyon ni Senador Marcoleta ket saan metlaeng nga isu ti agpannuray gapu ta ti hurisdiksyon ti dua a senador iti agdama ket iti Sandiganbayan.
Ni Marcoleta ket nakabalud gapu iti sangsangwen na a non-bailable plunder case mainaig iti maipagarop a saanna a panangideklarar ti P75 milyon a campaign donations, idinto a nakabalud met ni Estrada gapu iti plunder ken graft charges.
Nagtalinaed met ti takder ni Senador Alan Peter Cayetano a masapol a mapalubusan dagiti dua a senador nga agatendar iti impeachment trial.
Nupay kasta, inkalintegan ni Castro a basar iti nagbalin a palawag ni retired Associate Justice Antonio Carpio a ti indibiduwal a nakabalud gapu iti graft ken plunder ket masapol a masuspenso.
