LAOAG CITY – Kiniddaw ti maysa nga agpanpanday linteg iti Department of Energy (DOE) a siguradwen nga awan ti mapasamak a brownout iti sibubukel nga aldaw ti eleksyon intono 2025 maikontra iti power outage idi 2022.
Iti panagdengngeg iti Senate committee on energy nga idaulwan ni Senador Raffy Tulfo, inbatad na a masapol nga adda ti garantiya ti ahensya a saan ga agtultuloy ti panagkurkurang ti suplay ti kuryente iti midterm elections.
Inkari met ni Department of Energy Undersecretary Rowena Guevara a maaddaan ti baro a power plants iti pagilian iti agdama a tawen ken makaipaay ti nasurok a 4,000 megawatts.
Innayon na a manamnama nga adda pay ti maestablisar a baro a planta iti sumaruno a tawen.
Maipalagip nga iti eleksyon idi Mayo 9, 2022, inreport ti Manila Electric Co. (Meralco), a naaddaan ti 20 nga outage incidents iti nasakupan da partikular iti Metro Manila ken kaparanget na nga ili.
Nakairekord pay ti National Electrification Administration ti 201 a power interruptions iti intero a pagilian manipod iti oras ti alas-4 ti parbangon agingga iti alas-onse ti bigat iti kaaldawan ti eleksyon.