LAOAG CITY – Nangiparuk-at ti rakurak ni Senador Ronald “Bato” dela Rosa, maysa nga aldaw kalpasan a naarestar ken naikabil iti The Hague, Netherlands ni dati a Presidente Rodrigo Duterte tapno mausig iti International Criminal Court (ICC) para iti kaso a crime against humanity.
Iti post ni dela Rosa, ibatad na a nakasagana a mangkuyug ken taripatwen ni Duterte iti The Hague a pakaibaludan ti dati a presidente bayat a maus-usig.
Ti kaso kontra ken ni Duterte ket namonganay iti war on drugs nga inpatungpal iti administrasyon na a nakatayan ti saan a nababbaba ngem 6 a ribo a tattao.
Ni dela Rosa ti nagserbi kas hepe ti Philippine National Police (PNP) idi panawen nga inpatungpal ni Duterte ti kampanya kontra iti ilegal a droga.
Naarestar ni Duterte iti bileg ti warrant of arrest manipod iti International Criminal Court ken naibiyahe a dagus idiay The Hague.
Mainaig iti daytoy, inrakurak ni dela Rosa a no bilang sumaruno a maiserbian ti arrest warrant manipod iti International Criminal Court ket nakasagana a mangisumitir ti bagina, ken napagsaritaan dan daytoy a banag iti asawa na.
