LAOAG CITY – Inlungalong ni Senador Sherwin Gatchalian nga iraman iti nailungalong a rightsizing iti gobyerno ti maysa a probisyon a mangbukel ti plantilla positions para iti amin a kwalipikado a kontraktwal nga empleyado.
Iti maysa nga statement, inrakurak ni Gatchalian nga iprayoridad ti nasao a lungalong ti amin nga empleado a nabayagen a panawen nga agserserbi iti gobyerno.
Kuna na nga ado dagiti contractual employees a nasuruken a 10 a tawen nga agserserbi iti gobyerno a makaar-aramid iti requirement ti civil service ngem ti problema ket ti plantilla item.
Ti plantilla position iti gobyerno ket mangestablisar iti permanente a posisyon nga adda ti nakalatang a pondo iti tinawen a General Appropriations Act.
Innayon ni Gatchalian a ti rightsizing ket saan laeng a rumbeng a nakatutuk iti pannakapasayaat ti taray wenno operasyon iti gobyerno no di ket masapol a maikkan ti usto ken maibagay a posisyon dagiti empleado a nabayagen iti serbisyo.
