LAOAG CITY – Pinaregta ni Senador Sherwin Gatchalian ti gobierno a paigetan ti pannakaipatungpal ti comprehensive sexuality education (CSE) ken social protection program para kadagiti agtutubo nga inna.
Segun iti Senador, makapadanag ti nagbalin a report ti Commission on Population and Development (CPD) a dimmanon iti 22,000 dagiti agtutubo a nagsikog.
Maibasar iti datos ti Commission on Population and Development, adu nga agtutubo ti nagsikog iti tawen a 13 agingga iti 15.
Mainaig iti daytoy, inawagan ti senador dagiti pannakabagi ti linteg a nainget nga ipatungpal ti linteg a mangipapaay iti proteksion kadagiti agtutubo a babbai kontra iti seksual a panangabuso.
Maysa kadagitoy ti Republic Act No. 11596 a mangiparit iti child marriages wenno panagasawa dagiti menor de edad.
Kabayatanna, segun ken ni Gatchalian, maysa kadagiti kapatgan a pamay-an tapno masalakniban dagiti agtutubo ket ti panangtaginayon kadakuada iti pagadalan a pakasursuruanda ti comprehensive sexuality education ken makagun-odda kadagiti child protection programs.
