LAOAG CITY – Suportaran ni Senator Imee Marcos ti ilunglungalong ni Senator Chiz Escudero a palawaen ti lima a tawen ti termino dagiti opisial ti Barangay at Sangguniang Kabataan (BSK).
Inbatad ni Sen. Marcos iti napalabas a Kongreso, inlungalongna a pagbalinen kas innem a tawen ti termino ti BSK ngem adda dagiti sumagmamano nga agpam-panday linteg a saan nga umanamong iti pannakaiyatiddog ti termino isu a nagbalin laeng daytoy nga uppat a tawen.
Nupay kasta, nagpalagip ti Senadora ken ni Escudero mainaig iti pannakaitantan iti Barangay at Sangguniang Kabataan Election (BSKE) iti 2028.
Kuna ni Sen. Marcos a maiyataday iti ruling ti Korte Suprema mainaig iti Macalintal kontra ti Comelec idi Hunio 27, 2023, a ti termino ti BSK officials a naibutos idi 2018 elections ket nagleppas idi Disiembre 31, 2022.
No mapalawa iti lima a tawen ti termino ket kunana a kasapulan nga iti 2027 ti sumaruno BSKE ken saan nga iti 2028.
