LAOAG CITY – Naiget a binabalaw ni Sen. Raffy Tulfo ti Department of Social Welfare and Development (DSWD) gapu iti rinibu a social workers a saan pay a na-regular iti baet nga addan ti maysa a dekada nga agtartrabaho iti ahensia.
Iti panagdengngeg iti 2025 budget ti Department of Social Welfare and Development, inbatad ni Sen. Tulfo nga adu ti empleado ti ahensia ti agretiro ngem saan pay a na-regular.
Kunana a sakbay nga ibilin ti gobierno dagiti pribado nga institusion a sumurot iti linteg ket nasken nga umuna pay laeng daytoy.
Inlawlawag ni Tulfo nga iti agdama ket dumanon iti 6,038 a contractual ken job order employees ti Department of Social Welfare and Development a kaadduan kadakuada ket nakadanonen iti 10 agingga iti 15 a tawen nga agpapaalila ngem awan pay ti maaw-awat a benepisio.
Maipalagip nga idi pay napalabas a tawen ni Tulfo nga indasar daytoy nga isyu iti Department of Social Welfare and Development ngem agpapan ita ket awan pay ti nalawag a tignay.
Inlungalong ni Tulfo a mapaayaban inton sumaruno a panagdengngeg ni Department of Budget and Management Sec. Amenah Pangandaman gapu ta itudtudo ni Sec. Rex Gatchalian ti nasao nga ahensia.
Daytoy ket tapno malawlawagan ti komite no maikabil talaga ti regular plantilla positions iti nasao nga ahensia nupay gradual ti pannakaipatungpal daytoy.
