LAOAG CITY – Inadmitir ni Senadora Imee Marcos a nabayagen a saanda a nagsarita iti kabsatna a ni Presidente Ferdinand Marcos Jr.
Inbatad ni Sen. Imee, adda laeng dagiti gundaway nga agsaritada nga agkabsat kadagiti public gatherings.
Nupay kasta, inbutaktakna nga adda dagiti tao nga adda iti aglawlaw iti Presidente ti maipagarup a manglaplapped tapno agsaritada a dua.
Inlawlawag ti Senadora nga awan ti sakit ti nakemna ken ni Presidente Marcos kalpasan a saanna a dinakamat ti naganna iti maysa nga Alyansa rally idiay Cavite.
Kunana nga awan ti problema kenkuana iti nasao a banag gapu ta nakasentro isuna no kasano a maisubli ni dati a Presidente Rodrigo Duterte ditoy Pilipinas manipud iti The Hague idiay Netherlands.
Innayonna a nasken nga ipangpangruna ti panangdepensa iti soberania ti pagilian nga imbes nga isentro ti pulitika ken panagkampania.
