LAOAG CITY – Dinayaw ni Senate Minority Leader Aquilino “Koko” Pimentel III ti Department of Health (DOH) iti panangikkat na ti purchase booklet requirement para kadagiti senior citizen a maka-access kadagiti diskwento iti agas, nga inawagan na a dakkel a nakalukayan para iti nasurok a 9.2 milyon a nataengan iti pagilian.
Kuna pay ni Pimentel a dakkel a tulong daytoy para kadagiti senior citizen.
Inpaganetget na ti panangpalag-an ti panagbalbaliw ti proseso para kadagiti nataengan a sigud a simmango iti nadagsen a papeles tapno laeng makaala kadagiti diskwento.
Innayon na nga iti agdama ket al-aliston a makaala dagiti senior citizens kadagiti kasapulan da nga agas.
Nagpanawagan met ni Pimentel kadagiti local government units (LGUs) a pagbalinen a simple ti panagibunong kadagiti regalo dagiti senior citizens gapu iti kinakapuyen dagiti maseknan ken kasapulan da ti espesyal nga atensyon.
