LAOAG CITY – Kiniddaw ni Senate Minority Leader Koko Pimentel ken ni Presidente Bongbong Marcos a bumallaet iti Pambansang Pabahay Para sa Pilipino Housing Program (4PH).
Daytoy ket kalpasan a napaliiw ni Pimentel a saan a maragragpat ti programa ti gagem na, isu a rumbeng a tutokan ken repasuen ti Presidente ti Pambansang Pabahay Para sa Pilipino Housing Program (4PH), a maysa kadagiti kangrunaan a programa ti gobierno.
Inpetteng pay ti senador ti dakkel a gidyat iti disenio dagiti housing units a nakapokus iti condominium-type housing a makuna a saan a maitunos iti kasapulan dagiti benepisiario.
Kinuna ni Pimentel a nasken a maammuan ti pagkapsutan a paset ti programa tapno adda pay laeng ti gundaway a ma-adjust ti housing budget.
Segun kenkuana, saan nga umdas ti relief aid kadagiti kasapulan dagiti Pilipino, isu a kasapulan ti repaso tapno masigurado ti optimum ken efficient decisions iti pannakaaramat dagiti resources.
