LAOAG CITY – Inaprubaran ti maysa a Senate panel ti mailunglungalong a pannakaitantan ti Barangay ken Sanguniang Kabataan Elections (BSKE) ita a tawen ken aramiden a lima a tawen ti termino dagiti barangay ken Sanguniang Kabataan officials.
Segun ken ni Senator Francis ”Chiz” Escudero, kalikagum ti pannakaitantan ti nasao nga eleksion ti pannakaurnos ti termino dagiti barangay ke SK officials tapno saan a maulit-ulit a mabaliwan wenno usaren daytoy kas rason tapno maitantan ti eleksion kadagiti masangoanan a panawen.
Iti salinong ti Senate Bill No. 2387, kalikagum ni Escudero nga amyendaran ti Republic Act No. 12232 ken pagbalinen a lima a tawen manipud iti manariaan nga uppat a tawen ti termino dagiti barangay ken SK officials.
Kabayatanna, ni Senator Imee Marcos met ti nangipila ti Senate Bill No. 2067, a kaligaumna nga iyakar ti Barangay ken Sanguniang Kabataan Elections (BSKE) manipud Nobiembre 2026 ket agbalin nga Oktubre 2027.
Iti baet daytoy, nagpanawagan ni Commission on Electons (Comelec) Chairperson George Garcia ti nalawag a desisionda iti kabiitan a panawen no matuloy wenno maitantan ti nasao nga eleksion.
Segun ken ni Garcia, masapol a maamoan ti agbalin desision sakbay ti panagleppas ti bulan ti Setiembre, gapu ta ti naikeddeng ti filing of candidacies ket manipud Setiembre 28 agingga Oktubre 5.
