LAOAG CITY – Inbatad ni Senate President Vicente ”Tito” Sotto III nga awan ti plano ti Senate majority nga ipaay ti kina-Senate President ken ni Senador Loren Legarda tapno maliklikan ti maipagarop a kudeta, gapu ta awan ti umdas a bilang ti botos tapno mapadisi ti agdama a liderato ti senado.
Segun ken ni Sotto, uray idi damo paylaeng ket nalawag a maipagarop nga awan ti umdas a numero tapno sukatan ti liderato ti senado.
Inlawlawag na a tapno mapadisi ti maysa a Senate President, kasapulan ti 13 a botos nga adda ti nakasurat a commitment, ken saan nga umdas ti verbal laeng.
Inpetteng ni Sotto a narisgo ti kari iti panagbalbaliw ti liderato no awan ti nalawag ken dokumento a nakasuporta.
Innayon ni Sotto a no nakita ti maysa nga incumbent nga adda ti umdas a written commitments tapno masukatan daytoy ket boluntaryo a bumaba iti pwesto.
Inlawlawag na pay a naisina iti opisyal a sesyon dagiti innangaw iti Senate lounge, karaman ti rakurak ni Senate Majority Leader Miguel Zubiri a maipagarop nga inaramid na nga angaw ti maipanggep ti possible a panagtugaw ni Legarda kas Senate President iti panagleppas ti 20th Congress.
Mamati met ti Senador nga adda ti dua a rason no apay nga adda dagiti maggangdat a mapadisi iti pwesto na, umuna ti maipagarop nga isyu iti committee chairmanships, kalpasan a naikkat ni Senador Imee Marcos kas chair ti Senate Foreign Relations Committee ken maikadwa ket ti draft Blue Ribbon Committee report mainaig iti flood control scandal a mangirekrekomendar kadagiti kaso administratibo kontra iti tallo a senador manipod iti minorya.
Inpaganetget ni Sotto a saanen a baro ti ideya a kayat nga ipangato ni Sen. Legarda kas Senate President no sadinno a maipagarop a naaramid daytoyen idi mangrugi paylaeng ti 20th Congress.
Iti baet daytoy, inpasingked ni Sotto nga awan ti sakit ti nakem na kadagiti kakadwa na no kayatda a sukatan daytoy ken nakasagana pay a makitinnulong iti minorya.
Inpetteng ni Sotto a patas ti trato na kadagiti amin a senador, mayorya man wenno minorya.
