LAOAG CITY – Inadmitir ni Senate President Francis “Chiz” Escudero a nagbalin a nabara ti diskusionda idi, iti dati a liderato ti Senado mainaig iti Charter change (Cha-cha).
Segun ken ni Escudero, nagduduma ti nagbalin a rason dagiti senador iti panang-amyendar ti economic charter change iti dati a Senate President, no sadinno ket inbatadna a nagbalin a nabara ti saritaan kabayatan ti caucus seknan iti Resolution of Both Houses No. 6 kalpasan a kuestionaranna ti agtultuloy a pannakadengngeg na daytoy iti laksid nga ad-ado dagiti saan nga immanamong a senador.
Pinasingkedan pay ti lider ti Senado a kinontra na met ti pannakabukel ti Subcommittee on Constitutional Amendments para iti Resolution of Both Houses No. 6 gapu ta adda ti mother committee a rumbeng a mangtratar iti daytoy.
Impasingked ni Escudero a naruay dagiti kapanpanunotan ti tunggal senador iti panagbalbaliw ti liderato ken saan a karaman ditoy ti Senate hearing seknan iti Philippine Drug Enforcement Agency leaks.
Kinunana, a no Philippine Drug Enforcement Agency leaks ti rason, ket apay ni Zubiri ti nagikkat iti puestona idinto a mabalin a maikkat iti komite ni Senador Bato dela Rosa gapu ta isuna ti makin-iggem ti isyu.
