LAOAG CITY – Manamnama a kataripnong ni Senate President Francis Escudero ni Transportation Secretary Jaime Bautista tapno idanon dagiti arungaing seknan iti public utility vehicle modernization program pakairamanan ti husto a proseso iti pinansyal para iti panaggataang ti baro a jeepney units.
Daytoy ket kalpasan a saan a pinatgan ni President Ferdinand Marcos Jr. ti lungalong ti Senado a masuspenso ti programa gapo iti kinaakurang ti information drive ti gobierno ken iti kinadagsen iti bulsa iti panaggatang ti baro nga unit.
Kaadoan kadagiti senador ket simmuporta iti Senate Resolution 1096 a gagem na a masuspenso pay laeng ti programa tapno masolusyonan ti sumagmamano nga arungaing pakairamanan ti consolidation ti jeepney units a napaay a nangabtt iti April 30, 2024 deadline ken pannakapaay dagiti lokal a gobierno ngaa aprubaraan ti public transport route plans.
Inpetteng na a ti resolusyon ti Senado ket pakabenipisyaran dagiti saan a nakaabot iti deadline nga Abril 30.
Inpalgak na pay a ti laeng kalikagom ti Senado ket maitantan para kadagiti saan pay a nakasagana, kadagiti saan pay a nakalpas iti route plan ken kadagiti saan pay a nakumbinsir ti gobierno.
Kunana a saan a rumbeng nga iparit wenno ideklara a colorum dagiti ruta a saan pay a simmurot.
Maipalagip a naangay ti taripnong dagiti pannakabagi ti grupo a BUSSINA, Uv Coop, Pasang Masda, LTOP, ACTO, FEJODAP, ALTODAP, ken Stop and Go.
