LAOAG CITY – Nagkedked nga agkomento ni Senate President Francis “Chiz” Escudero iti maibagbaga a plano a kudeta ni Senate President pro-Tempore Jinggoy Estrada iti liderato ti nangato a pagpandayan linteg iti kongreso.
Iti baet a naglikudan ni Estrada ti plano a panangagaw iti liderato iti senado, kuna ni Escudero nga aniaman ti rumrumuar a plano ket agtalinaed a tsismis agingga a saan a mapasamak.
Maipalagip a daytoyen ti maikadwa nga adda ti tsismis a maibagbaga a gandat ni Estrada nga agawen ti liderato ti Senado a nangrugi paylaeng idi nagtugaw ni dati a Senate President Juan Miguel Zubiri.
Inrakurak ni Escudero nga adda ti sumagmamano a media a nagsaludsud iti miyembro ti Senado seknan iti tsismis nga agwarwaras iti Senado nga awan ti source ti impormasyon.
Maipalagip nga idi Lunes ket naiget a naglikudan ti sumagmamano a senador karaman ni Estrada seknan iti kudeta kontra ken ni Escudero.
Sakbay a nagtugaw ni Escudero, rimuar pay ti nagan ni Estrada a maisukat iti liderato ni Zubiri.
Iti panangidaulo ni Escudero, ado ti nagbali iti sistema iti senado malaksid iti nagbalin a nalawag ti sitwasyon iti uneg ken ruwar ti pasdek, ken pimmintas ti trabaho iti lehislatura iti kangatoan a pagpandayan linteg iti kongreso isut gapuna a sumagmamano a napapateg a linteg ti naipasa kas maiyataday ti kiddaw ti administrasyon.
