LAOAG CITY – Mamati ni Senate President Tito Sotto III nga adda pay ti nangatngato a grupo ngem iti Bulacan Group of Contractors wenno BGC Boys nga adda ti pakainagan na iti anomalya a flood control projects.
Segun kenni Sotto, saan a kumbinsido kadagiti rakurak ni dati a Bulacan District Engineer Henry Alcantara kabayatan iti naisaysayangkat a panagdengeg.
Kuna ti senador nga amin a BGC Boys ket addaan ti pagsungbatan kadagiti kwestyunable a proyekto ti Department of Public Works and Highways (DPWH).
Kabayatanna, inbatad pay ti Senate President a nakasaritan ni Justice Secretary Jesus Crispin Remulla dagiti agasawa a kontraktor nga isuda Pacifico Discaya ken Sarah Discaya para met iti kidkiddawen da a witness protection program (WPP).
Innayon ni Sotto a nasken nga ibaga pay nga ummuna dagiti agasawa a kontraktor ti amin nga ammo da impormasyon a makatulong sakbay nga aprobaran ti Department of Justice (DOJ) ti kiddaw da.
