LAOAG CITY – Namnamaen ni Senate President Sherwin Gatchalian nga agatendar amin dagiti senador, karaman dagiti miembro ti minorya, iti pangrugi ti impeachment trial ni Vice President Sara Duterte ita nga aldaw ti Lunes, gapu ta paset daytoy ti obligasyon ken trabaho da kas senator-judges.
Iti maysa nga interview, inrakurak ni Gatchalian a napateg a personal a mangngeg ti kada senador dagiti maipasango nga ebidensya ken argument ti agsumbangir a partido tapno naan-anay nga agbalin da a paset ti trial.
Kuna pay ti Senate President a mabalin ti agsaludsud dagiti senador kadagiti testigo, kasta met iti prosecution ken defense panels, kabayatan ti pannakaisayangkat ti trial.
Nupay kasta, inpetteng ni Gatchalian a saan a rumbeng nga aramiden a forum ti impeachment court tapno trataren ti dadduma pay nga isyu, karaman ti legal a saritaan mainaig iti pannakaelektar na kas Senate President.
Maipalagip nga immunan nga inrakurak ni Senate Minority Leader Alan Peter Cayetano a mabalin a maikabil iti alanganen ti panagbalin a patas ti impeachment trial kabayatan a saan pay a nasolbar ti Supreme Court of the Philippines ti petisyon na a mapaawan bileg ti sesyon iti senado idi Hunyo 3 no sadinno a naelektaran ni Gatchalian kas Senate President.
