LAOAG CITY – Inrakurak ni Senate President Tito Sotto a trataren ti Senado a “forthwith” ti Articles of Impeachment kontra ken ni Vice President Sara Duterte no iyuli kadakuada ti Kamara de Representantes.
Segun ken ni Sotto, dagus a panagtignay ti kayatna a sawen ti forthwith wenno “the following day.”
Mainaig iti daytoy, nagpaawag ti taripnong ni Sotto kadagiti pada na a senador tapno saganaan ti panagbalin nga impeachment court ti senado no maiyuli kadakuada ti kamara de representantes ti impeachment complaint kontra ke ni Duterte.
Maipalagip nga idi Miyerkules ket nagdesisyon ti House Justice Committee nga adda ti pagibasaran ti dua nga impeachment complaints kontra ken ni Duterte kalpasan ti naan-anay a panangtratar da.
Kalpasan iti daytoy, matratar ken pagbobotosan ti amin a kongresista iti plenaryo no aprubaran wenno saan ti rekomendasyon ti komite nga i-impeach ni Duterte.
Apaman a makaala ti umdas a botos tapno paburan ti rekomendasyon ti komite, agbalin nga Articles of Impeachment ti reklamo kontra iti bise president ken ikabil da daytoy iti senado nga agbalin nga impeachment court.
Tumakder dagiti senador nga huwes, ti mangusig wenno mangdengngeg iti kaso no adda ti umdas nga ebidensiya tapno ikkaten wenno saan iti pwesto ni Duterte.
Nairiing manen ti sarita a “forthwith” kalpasan ti nagbalin a palawag ti Korte SUprema a saan a kaipapanan ti dagus wenno iyalisto ti panangtratar iti impeachment kas ti pammati ti dadduma iti nailanad iti konstitusyon.
