LAOAG CITY – Kwinestionaran ni Senate President Tito Sotto III dagiti abugado a nangipila kenkuana ti petision iti Korte Suprema.
Daytoy ket mainaig kadagiti nagbalin a rakurak ni Sotto kontra iti Korte Suprema kalpasan a naideklarar nga unconstitutional ti impeachment complaint nga inpila ti Kamara de Representantes kontra ken ni Vice President Sara Duterte.
Inbatad ni Sotto, iyurayna pay laeng ti kopya ti petision manipud iti Korte Suprema sakbay a sungbatanna ti maipanggep daytoy a banag.
Sinaludsod ni Sotto dagiti nangipila ti petision a kasano met dagiti dadduma pay a personalidad nga umannugot kadagiti dinakamatna a factual errors iti desision ti Korte Suprema ken ti posibilidad a naaddaan ti judicial legislation gapu ta arig binaliwan ti Korte Suprema ti nakailanad iti Konstitusion.
Maipalagip a nangipila ti petition for indirect contempt iti Korte Suprema kontra ken ni Sotto da Atty. Manuelito Luna, Atty. Ferdinand Topacio ken Atty. Harold Respicio gapu ta maipagarup a lumablabesen ti Senate President iti “legitimate commentary” a mangdadael iti kredibilidad ti Korte Suprema kadagiti umili.
