LAOAG CITY – Nagpalagip ni Senate President Vicente “Tito” Sotto III kadagiti kakadwa na iti senado nga agtalinaed a patas wenno “impartial” iti kanito a ti Articles of Impeachment kontra ken ni Vice President Sara Duterte ket maiyuli iti kangatoan a pagpandayan linteg iti kongreso para iti pannakausig na.
Iti agdama ket manarimaan ti panagdengngeg ti Committee on Justice iti kamara de representantes tapno maestablisar no adda ti probable cause tapno maitultuloy ti impeachment trial.
Target a maileppas dagiti deliberasyon agingga iti Abril 29 ti agdama a tawen.
Para iti Senado, nakipagkitan ni Sotto kadagiti kakadwa na tapno makapagsagana da iti kanito a maiyuli iti senado ti kaso kontra iti bise presidente.
Kabayatanna, dinillaw ni Sotto ti rakurak ni dati a presidential spokesman Salvador Panelo nga addan ti uppat a senador, pakairamanan ti senate presidente a nagbotos tapno pagsungbaten ni Vice President Duterte.
Maipalagip a dagiti tallo pay a senador nga innaganan ni Panelo ket isuda Senador Ping Lacson, Senador Francis Pangilinan ken Senador Risa Hontiveros.
